(1881) El dispertar de Xuanón
Fai un sol q´aplana ´l mundo:
y á la sombra d´un carbayu
con más fueyes que mudancies
tien una muyer al añu,
ronca Xuan el Topineru,
sobrín de Pepon el Pachu,
primu de Bras, el Cebollu,
y de Xiromon del Trasgu;
hermanu d´Anton el gochu,
q´ansina fó bautizau
desq´un dia por apueste
i vieron rucar un sapu;
pariente de Rifaela
la fía de Cosme ´l nanu
y de Ritona la Coxa,
que se morrió d´un mal partu
sin echar tres creaturos
que calabres i alcontraron
en´a barriga del vientre
dimpués que ´l güeyu y ciarraron.
Pos, como diva diciendo,
está Xuanon panza abaxo
metiendo pe les ñarices
al surniar tierra y yerbatos,
xiblando como les víbores
al allendar fatigáu,
con el rostru de la cara
sobre un tapin descansando,
entrambes pates abiertes
y com´ un Cristo los brazos.
En una cueva de grillu
dexó ´l garrote llancáu,
y´ en él punxo la picona
á modu d´espanta-páxaros.
Non tien parada so cuerpu
po la morde que ´l mazcayu
metánes d´un formigueru
cuadrói fincar ´l espinazu.
Entámen el viaxe á un tiempu
del cocorote al sobacu,
más formigues que diez goxos
pudiesen facer d´arándanos.
Y él más listu, anque dormiendo,
que liebre que güele ´l galgu,
ya s´enduviella de pronto
ó s´apurre un puñetazu;
ya se vóltia y los focicos
espelleya contra un cantu;
abre un güeyu, ciarra ´l utru,
ruca per desesperáu
mueles, dientes y caniles,
mas con ruidu tan estrañu,
q´asemeya la carraca
d´un rapaz de Xueves Santu.
Dimpués d´estes ventoleres
que lu dexen desgonciáu,
tuse, cuspe y durme al cabu,
Ye verdá que co la sidre
que trasiegó, quince vasos,
está un poco á lo bolero
por non dicir amoriáu.
Ye sidre que ´n un candil
ardería sin dar tastu,
de la tercer llagarada
que fexo pa viender Márcos
en el llagar de Tiburcia
consuegra de Pin d´Hilario
madre de Bastian el foscu,
que morrió d´un fesoriazu
que i apurrió ´n Valdesoto
un día estando ´n el sallu,
Miguelin el Puchereru,
porque i vió dái un abrazu
esfarrapándoi el dengue
á Carmina la del Cáñu,
co la que ya los pregones
tenía ´l rapaz echáos.
Fói un llance de tres pelos,
por non dicir d´un puñáu,
el q´ entoncies vió la xente
q´allí ´staba trabayando.
Como ´l güé ´nel mataderu
al sentir el porronazu
que i apurre ´l carniceru
cái el suelu com´un rayu,
ansina cayó ´l probete
corriendo com´ un d´un cañu
del crániu de la cabeza
la sangre pa todos lláos.
Dos hores vivió y la pata
espurrió lluego… ¡Dios santu!
¡Mas qué sofrir en dos hores…..!
¿nunca viesteis d´un cantazu
dexái á un esculibiertu
el cuerpu léxos del rabu?
¿Non viesteis isti dar güeltes
ya de frente ó de costadu
trocando en eses les óes
que i fai remedar el diaño?
Pos ansina mesmo, el mozu,
ya tiesu, ya encivielláu,
como morciella ´l fumeru,
pero siempre espatuxando,
dió ´n engurriar les ñarices,
poner los güeyos en blanco,
afinar y aflamencáse
pa mudáse al utru barrio.
Hebo xosticia, prisiones
con que medró ´l escribanu,
q´estes causes son les causes
de que mos llamban los cuartos….
Mas ¡carape! ¿cómo amesto
otra vez el mió rellatu?
¿qué tien que ver lo d´agora
con aquél estandoriazu?
Si morrió, Dios lu perdone;
ya isi llabor tien á un lláu,
que probes y fanegueros
faremos tardi ó tempranu.
Dixe, que fartu de sidre
estaba ´l mozu roncando,
pos el caldo yera bono
y una fiesta fáise á un santu.
Ya quier esmucíse ´l día;
y el fresquillin de los altos,
baxa á los valles muy séle
les vidayes refrescando.
Ye la hora ´n que les roses
se piesllen, al cielo unviando
so risina más melguera
con so golor más preciáu.
El marmullu de la fonte
déxase sentir más claru,
y al ver el negru esperteyu
cuerren pal ñeru los páxaros.
Entama á esclucar la lluna,
pos por si mesmu abrasáu
fuxe ´l sol d´oro vistiendo
les ñubes q´alcuentra ´l pasu.
Lloñe… muy lloñe, amorosu,
trái ´l soplu triste cantu,
que fái más triste la esquila
q´ al andar ruxe ´l ganáo.
Hay quien cuida que ´n aldea
con tantes sebes y escayos,
non cuela ´l amor, y á naide
i finca so taragañu.
Pos non ye verdá; isi mal
q´escaxiella á los humanos
y sin fuelgu al más regustu
lu dexa si muerde gafu,
en Morcín como ´n Uvieo,
en Avilés como ´n Grao,
en Piloña como ´n Flandes
y en Perpiñan como ´n Pando,
desde ´l sol allumó ´l mundo
y hebo ´nisti fema y machu,
fexo amor siempre so agosto
en cualquiera mes del añu.
¡Ay! si les pales de dientes
falaren y los gadaños!
¡Cuántes llágrimes veríen
resbariáse por sos mangos!
Quien dixo amor, dixo flores;
y si aquestes en ´os campos
más zaragozanes crecen,
tamien amor; está claro,
Allí ´l paxarín parleru
sabe ´char gorgolitando
la presona, ´n so llenguaxe
si barrunta y´ escuchadu.
Entóncenes so dolzura
ye tan grande, tal so encantu,
q´al mesmu sol, al oillu
prúyei baxase á besallu.
¿Créislo agora? ¿non y´ansina
de pé á pá lo faláo?
El amor y el sarapicu
y utres llácares que callo
por sabíes , non respeten
ni al gordu, nin al flacu,
nin al probe, nin al ricu,
nin al negru, nin al blancu,
y en ciodáes, com´aldées,
estocina que y´un plasmu.
Tamien Xuanon d´isti mal
carez ya fái más d´un añu
y per flacu, taramiella,
si aporta q´echa un rebalgu.
El que ´n andeches y files
conocíen por el trasgu,
y escurría casa-dielles,
que non acertaba ´l diablu,
hoy más triste que pantasma
fuxendo del campu-santu
y allumada pe la lluna
con so más pálidu rayu,
sospira, xime, empapiella,
rábia, escocia y alloriáu,
quier segar co la fesoria
y cavar col garabatu.
D´afechu ´stá sin mollera
des q´un domingo, danzando,
mirólu ´n tientes Xiróma
la nieta de Pin el mancu.
Ye verdá que ye una neña
q´onde afinca ´l so calcañu
dexa un alfonil de sal,
pos naide la gana ´n garbu.
Si mira de cuando al cielo,
los lluceros amusgáos,
fuxen, pos los de so cara
llucen más y son más guapos.
Rica ñerada de perles
dexa ver, si aporta ´l casu
q´al rise ´l coral s´estrema
que Dios i punxo por llabios.
Cómo áta ´l dengue esa xana
yo non acierto á esplicallo,
solo sé que más que dengue
ye cárcel d´enamoráos.
Non hay mozu ´nel conceyu
q´al colar no i deba un cuartu,
pos á más de dar envidia
fasta les roses de Mayo,
tien de suyo casa y hórrio
y daqué ´n tierres y práos.
Vióla Xuan y de secute
sintió ´n so pechu llancáu
el obleru que Cupido
disparói p´atormentallu.
Pensar n´ ella, contemplalla,
yera so mayor encantu,
y ansí fó q´utru llabor
non entamaba ´l cuitadu.
Non piesllaba güeyu ´l probe;
y si rendíu, un pigazu
llegaba á echar, mil corcobos
dar i facía un mal suañu.
Víala pulgar castañes
pa útru más afortunadu;
facéi veyures y rise
muy xuntinos trebeyando.
Isti mal, isti martilio,
esta llacéria, isti plasmu
que dexa al home los niervos
llatidosos y alteriáos,
por non sofrir, el tinteru
pidió al fin al ´ escribanu,
y un xueves, cuando albanciaba
y l´alborada los páxaros
alzando ´l piquin al cielu
dan á Dios gorgolitando,
púnxose á escribir gozosu
sobre la esquirpia del carro,
esta carta, q´á la moza
llevó un rapaz por un cuartu.
“Xiróma, sabrás Xiróma
como yo vivo penando
con un caleru ´nel pechu
que me turra y quema el cuayu.
Isti forno ´n que ´l amor
árgoma ye ´n que m´abraso,
enciendisti con tos güeyos
que la llume al sol robaron.
¿Dexarás que ´n un turrion
se troque quien te quier tanto?
¿Non darás la melecina
al que muere pol to garbu?
¡Ay de min! si non me cures
verásme dir ente cuatro
cantándome ´l gori-gori
muy deprisa ´l utru barrio.
Además, ¿qué culpa tengo
en querete? ¿qué mal faigo?
¿porqué tan guapa de fexo
por su antoxu ´l Soberanu?
Yo tenía un corazon
que llatía asosegadu;
mas vite, y en revolvín,
que non para, está trocáu.
Cantaba y con mios cantares
non me rendía ´l trabayu,
y hoy sospirar ye mió dicha
y un día ríndeme un añu.
Quierme por Dios rapacina
y homildicu al to mandatu,
verás en Xuan, un fiel criadu.
Posdata.- Cuanto t´avague
si tienes un papelacu,
pon si echaré un ijujú
ó si me desfairé ´l crániu.
Como me falta una oblega
y pan non alcuentro á mano,
escurrí cierrar la esquela
con magaya de llimiagu.”
……….
Esmorciellábase ´l sol
lluciendo ´l últimu rayu,
que fái reíse á los montes
y alegráse á los peñascos,
cuando ´ntónces mesmamente
del probe Xuan llegó á manos
la rimpuesta de Xeróma
q´entamó á llér sospirando.
“Atendi, Xuan, i decía,
mira, Xuan; si tan babayu
te fexo Dios, Xuan amigu,
tengo yo la culpa acasu?
¿Quién te mandó ´namorate?
¿Hebo presona ´nte entrambos?
¿Díxete que me folgaba
con to querencia da cuando?
Non deliries, Xuan, ten xuiciu;
que pal focicu del asnu
non faen miel les abeyes
como ´l refran diz bien claru.
La llapada que ´n el pechu
sientes arder, col trabayu
afogarás, que ´l llaviegu
cura isi mal que y ´un plasmu.
Llegasti tardi, Xuanín,
que ´sta frera ya tien santu,
y non ha tardar el cura
en echar el hisopazu.
Seré la muyer d´un Xuan:
pero d´un Xuan, tan saláu,
que cien Xuanes como tú
non i allegais á un calcañu.
Sin oblega, pa cierralla,
desimula, si un emplastu
con quésu d´afuega ´l pitu
fixe pa salir al pasu.”
……..
¿Viésteis dacuando, pel río
un saca-güeyos bufando,
ó a la vera de les sebes
revoltiar dañible ´l tábanu?
Pos ansina mesmo ´l mozu
como perru que del rabu
i pinga un bote con piedres
que lu fái fuxir rabiando,
fuxó d´aquella quintana
el fardelin al costazu,
la gadaña enriba puesta
y el d´acebu en una manu.
Un añu fái q´aflixidu
non trió ´l suelu asturianu,
y por tierra de Castiella
ganó la vida segando.
¡Un añu fái! pero ¡ay triste!
aquel amor, hoy más gafu,
féxolu tornar al pueblu
pos más lu encerriza ´l diañu.
Como les penes se afueguen
y les penes dan secañu,
ántes de llegar á casa
engargoló quince vasos.
Ansina fó que rendíu
por el zumu y el cansanciu
durmióse, que nunca ´l sueñu
neiga Dios al disgraciáu.
¡Ay! non dispiertes, mió probe,
pos quiciáes dispertando,
te ponga, de la cabeza,
elemente un desengañu.
Pero como nisti mundo
todo pasa ´l fin y al cabu,
pasói la chispa, abrió un güeyu
y al vése solu ´nel campu,
llanzó un sospiru, y un nome
que ´n el alma tien llancadu,
prenunció, que sele ´l vientu
llevó al colar enriedando.
En aquel entós mil gritos
´nel rebollal s´escucharon
ente ´l glayar de la gaita
que d´afechu lu plasmaron.
¡Vivan los novios! decíen
les voces; ¡vivan mil años
Xiróma y Xuan el mosquitu
y q´á ver lleguen vicácanos!
¡Ay un galán d´ esta villa!
alegremente cantaron
les moces, sin ver el triste,
que d´amor muerre, olvidáu.
Pos cuando isti son del monte
asonsaña aquerelláu,
y cuando ya de la gaita
s´oye ´l toquidu lexanu,
Xuan, como un llocu, el fardel
desañuda, y col gadañu
dexó sin nuez el gargüelu
morriendo allí desangráu.
¡Probe mozu! que ´nel sueñu
yera Xiroma to encantu
y dispertando la muerte
te dió de to amor en pagu.
Y co la postrer boquiada
prenunció un nome so llabiu
¡siempre ´l mesmu! cuando lloñe
s´escuchaba alegre cantu.